2020 жылдың 8 желтоқсан күні университет ректоры Серғалиев Нұрлан Хабиболлаұлы мен қазақ филологиясы кафедрасының оқытушылар құрамы М. Өтемісов атындағы БҚУ доценті, филология ғылымдарының кандидаты Аронов Құспан Ғұмарұлын мерейлі 60 жасымен құттықтады.
40 жыл ұстаздық етіп, оның 25 жылын М. Өтемісов атындағы Батыс Қазақстан университетінде қазақ филологиясы кафедрасында қызмет етіп келе жатырған Құспан Ғұмарұлын Қазақстан Республикасының Мемлекеттік хатшысы Көшербаев Қырымбек Елеуұлы арнайы құттықтау хатымен БҚО әкімінің орынбасары Серік Рахметоллаұлы табыстады.
Ректор Нұрлан Хабиболлаұлы: «Сіз Қазақстан Республикасының білім беру ісі мен қазақ тіл білімі саласына толағай үлес қосқан, өресі биік, өрісі кең ұстаз әрі талантты педагог, білікті ұйымдастушысыз. Сіз жетекшілік етіп, ғылым жолына баулыған шәкірттеріңіздің бірқатары білім беру саласының мақтаныштарына айналып отырғанын ізгі ниетпен айта аламыз. М.Өтемісов атындағы Батыс Қазақстан университетінде аға оқытушы, доцент лауазымында қызмет етіп, оқудың барлық мақсаттары мен міндеттерін жүзеге асыруға бағытталған 40-тан астам оқу-әдістемелік құралдарын, ғылыми мақалалар шығарып, студенттердің кәсіби біліміне бағдарлама жүргізуге арналған әдістемелік ұстанбалар дайындап, қажырлы еңбек етіп келесіз. Асқақ абырой биігімен жеткен мерейлі 60 жасыңызбен шын жүректен құттықтап, деніңізге саулық, отбасыңызға бақыт тілеп, ұзақ ғұмыр сүруіңізге шынайы тілектеспіз» - деп жылы лебізін білдірді.
Кафедра оқытушылары ф.ғ.к., доцент Ниязғалиева Ақзия Әділқызы, аға оқытушы Қадырғалиев Жоламан Дүйсембіұлы, п.ғ.д., профессор Қыдыршаев Абат Сатыбайұлы, кезінде жетекшілік еткен топ студенттері, бүгінде әріптес Хабиева Дина Гарифуллаевна, Әжіғалиев Марат Қайыржанұлы, Ақбулатов Айдарбек Ахметұлы да өздерінің естеліктері мен ізгі тілектерін білдірді.
